I pettini 'i Vanni

Vanni era liccu 'i pettini nustrali,
pisci di carni fina e spiciali.
Ma siccomu custavanu assa'cari
iddu 'i puteva sulu taliari.

Un jornu si chiamò o'Michiricianu,
'u megliu piscaturi di 'nto chianu
e pi du'rotula 'i pisci ci prumisi
barba e capiddi pi 'na para 'i misi.

- Daccordu, dissi, e commu 'a sintinella,
ogni matina affacciati a'Stradella.
Quannu c'è 'a 'nsinga supra 'a palummedda
po'priparari tianu e padedda.-

Jornu pi jornu aveva,'ddu mischinu,
l'occhi appizzati versu Zappardinu.
Ma nun vidennu 'nsinga supra o' "tiru"
'nghiutteva 'n vacanti e jittava un suspiru.
Ma un bellu jornu, dopu Santu Roccu,
si rumpi lu 'ncantesimu e 'nto croccu,

supra 'a prua d'a varca, c'era 'mpisa
'na maglia 'i sutta o forsi 'na cammisa.
Appena 'a visti, 'u varveri, 'mpazziu.
Scappo o'saluni e, lestu, lu chiudiu.

Dopu, satannu commu 'na jaddina,
si partiu di cursa, rina rina,
'nta 'a 'ddu scattiu di caudu d' 'a 'stati
ch'i spaddi 'i fora e 'i causi arriddicati,
c'un fazzulettu di zammara russu
'ngruppatu 'n testa e n'autru p' 'u mussu.

Iemu ora ca tutta la passata
fu vista e fu palisi 'nta la strata
e ddocu tutti, amici e cumpari,
si dissiru : - Carusi, c'am'a fari ? -

Di lu malocchiu Vanni s'attirreva
tantu ca 'ddu saluni lu tineva
chiunu di corna, agghi e pipareddi,
ferri di seccu e pinnazzi d'aceddi.

'Nta ll'occhi, tacimati, si vardanu
e suttabotta tutti dicritaru,
senza nuddu timuri di sbagghiari:
- ' I pettini ci avemu a picchiari ! -

E 'n tempu nenti armaru 'u battagghiuni
specializzatu a rumpiri .....'i maduni.

Ninittu 'u maresciallu e 'u Catanisi
s'appuiaru o' palazzu d' 'u marchisi.
Turi Segretu si misi a punta 'i strata.
Sirviu Maniaci 'nta 'cchianata.

'U Baconchi vicinu a' Ridduciuta,
'u Luciteddu e Don Cola a' nisciuta.
Dopu, pi cumpritari 'a camurria,
l'avvucatu Villanti a' piscaria.

Ora, 'u barberi, 'nchianannu di mari,
di ddà pi forza aveva a transitari.
Accussi ognunu, appena iddu passava,

ci taliava 'i pisci e tistiava.
E accussi fu ! Nisciutu d' 'a scalitta,
cumincianu, d' 'u primu a manu dritta.

E a parti 'a taliata d'occhiu rassu,
parrannu si pigghiaru 'u meghiu spassu.
- Pisci boni... Vannittu ! Sangue e latti.
Ddocu c'è 'i billiccarisi 'i piatti.-

 - Fattilli fritti, beddi 'ncastagnati
e pi contornu du' alivi scacciati . -
- Tiricci 'u sugu e ci consi 'i spaghetti,
poi menzu litru 'i vinu e t'arrisetti .

- 'Mmuccamu ! ... oggi furchetta e cuteddu !
....Sunnu di Calavà o d' 'u casteddu,
o su' pigliati o' signali di Nasu ?
... Ma futtitinni, non ci fari casu !

A Giuiusa cu mancia pisci boni ?
... Vanni, 'u marchisi e 'u capustazioni ! -

E manu manu c'ognunu parrava
a Vanni 'a bucca 'i ll'arma ci scattava.
Jiuntu chi fu davanti 'e balatuna
jittau 'na schigghia e quattru santiuna.

Vardau 'n celu, ... non ci 'a fici chiù !
- Gesuzzu, dissi, ci ha pensari tu
pi 'ss'occhi rassi, ziuli e picchiusi.
Falli ristari cu li jiargi 'nchiusi.

Ca 'n sà ma' Diu un pisci mi manciassi
cu 'na resca 'i traversu m'affucassi- -
Vardò a tutti 'nta facci stracanciatu,
sciossi 'i ruppa d'a 'a truscia, e 'ncaniatu,

tutti 'i pettini 'n terra sduvacò
e , ballannucci 'i supra, 'i scafazzò.